O Consello Escolar Municipal do Concello de Boiro pon en valor o Proxecto EnClave como estratexia fundamental para fomentar hábitos de vida saudábeis, fortalecer as competencias socioemocionais e previr o acoso escolar. O alcalde, José Ramón Romero, e as concelleiras, Carmen Silva e María Outeiral, presidiron a sesión celebrada na mañá deste xoves 28 de maio, na que se fixo balance do curso 2025/2026.
O eixo central do Consello Escolar Municipal foi facer un reconto do Proxecto EnClave que neste curso 2025/2026 recibiu un premio no IX Concurso de Boas Prácticas Municipais na prevención e intervención fronte ao absentismo e na mellora da convivencia escolar.
“Este premio é o resultado do bo facer de toda a comunidade educativa que se implica en mellorar cada ano os programas deste proxecto para atallar as necesidades detectadas no ámbito educativo”, recoñeceu o alcalde.
Pola súa banda, o persoal técnico explicou a avaliación realizada dos distintos programas realizada tanto polos profesionais que os imparten como polos equipos directivos e anunciou os programas que se van a seguir desenvolvendo para o vindeiro curso. Neste senso o peso do Proxecto seguirá recaendo nos programas de prevención do acoso escolar e saúde mental; pero tamén continuarán os programas de Screening Visual e detección temperá de dislexia e TDA/H.
A maiores para o curso 2026/2027 vaise implementar un proxecto piloto mediante un convenio con Alar Galicia para a prevención de condutas aditivas de pantallas ou consumo de sustancias.
“O Proxecto EnClave é un programa que se vai adaptando ás necesidades detectadas nos centros e que se vai modulando segundo as propostas dos axentes educativos”, afirmou a concelleira Carmen Silva.
Nesta sesión do Consello Escolar Municipal tamén se tratou o Camiño Escolar Seguro, que na actualidade tiña un trazado provisional mentres non se rematen as obras para a dotación de beirarrúas na avenida da Constitución; e tamén se trataron outros temas como as axudas ás ANPAS para o desenvolvemento de actividades.
O Consello Escolar Municipal ten como finalidade detectar e dar solución aos problemas e necesidades xurdidas no ámbito educativo. Este órgano, no que está representada toda a comunidade educativa do municipio, está en condición de ofrecer unas perspectivas de interese xeral que axuden a clarificar e resolver aquelas problemáticas detectadas no eido escolar.
