Os comuneiros de San Isidro, na parroquia pobrense de Posmarcos, denuncian unha vaga de ataques de lobos que nas últimas semanas acabou coa vida de quince xatos, xerando preocupación e perdas económicas entre os gandeiros da zona.
O último caso produciuse hai apenas uns días. O propietario do animal, Luis Pose Lariño, asegura que non ten dúbidas da autoría. “Un compañeiro viu dous lobos atacando un pucho e o meu fillo chegou a gravar cinco exemplares xuntos”, explica. Moitos dos animais atacados tiñan apenas días de vida, o que dificulta mesmo o seu rexistro.
Os gandeiros alertan de que os lobos están a centrarse nas crías, máis vulnerables, aínda que temen que os ataques poidan estenderse ao gando adulto. “No inverno xa teñen matado algunha besta”, engaden.
Máis alá do impacto emocional, subliñan as perdas económicas que supón cada ataque. Segundo explican, un xato que agora pode valer arredor de 200 euros acada en poucos meses un valor de entre 500 e 1.000 euros, fundamental para a economía das explotacións.
Os comuneiros recoñecen que a presenza do lobo é histórica na zona, pero consideran que os ataques aumentaron nos últimos tempos, en parte polo abandono do monte. Por iso, reclaman ás administracións medidas urxentes como rozas, queimas controladas e autorización de batidas.
Ao seu xuízo, estas actuacións permitirían compatibilizar a actividade gandeira coa presenza da fauna salvaxe nunha contorna como a da Curota.
