Esta fin de semana, o venres e o sábado, vaise celebrar unha das grandes celebracións do Barbanza nesta tempada pre-veraniega: o Festival Hórreo Vivo, evento cultural, gastronómico, lúdico e musical organizado pola Asociación Cultural A Carballeira de Baia (Araño) coa colaboración do Concello de Rianxo. As actividades focalizaranse novamente na Carballeira de Baia, en Araño. Todo o programa será balde para veciños e visitantes.
O venres 22 o festival inclúe unha sesión de teatro infantil ás 21.30 horas, coa peza O Cociñeiro Antón e a Pasteleira Tomasa, a cargo de Teatro Calavera. Logo haberá un obradoiro de pasta de azucre e a partir das 23.00 horas a exhibición Ceima Rimas (o primeiro e único proxecto colectivo dedicado en exclusiva ao rap improvisado (freestyle) en lingua galega, co obxectivo principal é impulsar o uso social do galego entre a mocidade a través do hip-hop).
O sábado 23 de maio a festa comezará ás 10.30 horas cunha andaina guiada con saída dende o Hórreo de Araño. Ás 13.30 horas haberá unha sesión vermú coa Orquestra Neverloura e logo un xantar con churrasco, paella ou polbo. Incluirá unha sobremesa con Os Pequenos do Barbansa. Haberá postos de artesanía, unha foodtruck de Chichalovers e Pizzas do País. Pola tarde, a partir das 16.30 haberá xogos populares para persoas de todas as idades con Vai de Vai. Ás 18.00 horas celebrarase unha degustación de produtos de Da Veiga, e Bodegas Lodeiros. Pola noite, a partir das 22.00 horas haberá un concerto con algúns dos artistas e agrupacións de meirande nome actual na música galega: Sés, Grande Amore, Alana e Kike Varela.
