Cáritas Diocesana de Santiago presentou esta mañá o balance anual de actividades da Área de Emprego correspondente a 2025 na área de Santiago, nun acto celebrado no Hotel Palacio do Carmen, onde tamén se fixo entrega de diplomas ao alumnado participante nas distintas accións formativas desenvolvidas durante o último ano.
O acto estivo presidido polo arcebispo de Santiago de Compostela, Francisco José Prieto Fernández, xunto coa directora de Cáritas Diocesana de Santiago, Pilar Farjas Abadía. A xornada contou ademais coa participación de representantes da Xunta de Galicia, do Concello de Santiago de Compostela, empresas colaboradoras e participantes dos programas de inserción sociolaboral.
Máis de 600 insercións laborais en 2025
Durante 2025, a Área de Emprego de Cáritas na área de Santiago logrou un total de 627 insercións laborais, consolidando un modelo de intervención centrado no acompañamento personalizado e a xeración de oportunidades reais de acceso ao mercado laboral. Delas, 66 insercións estiveron directamente vinculadas a procesos de formación impartidos pola entidade e 561 foron resultado da xestión de ofertas de emprego e do traballo de intermediación con empresas.
Na súa intervención, monseñor Francisco José Prieto Fernández destacou que “o emprego digno non só garante ingresos económicos, senón que devolve estabilidade, autoestima e esperanza a moitas persoas e familias”. O arcebispo subliñou ademais “a importancia de crear unha economía que non descarte a ninguén e que poña á persoa no centro”.
Pola súa banda, Pilar Farjas Abadía puxo en valor “a capacidade transformadora dos itinerarios integrais de inserción” , sinalando que “detrás de cada contrato hai procesos moi complexos de escoita persoal, formación, acompañamento e recuperación da confianza”. A directora de Cáritas destacou tamén “a implicación crecente do tecido empresarial galego na xeración de oportunidades laborais inclusivas”.
Acompañamento integral e foco en mulleres migrantes
A entidade incidiu especialmente no valor dos denominados “itinerarios completos” de inserción sociolaboral, entendidos como aqueles procesos nos que a persoa participante percorre todas as fases previstas de acompañamento: diagnóstico inicial, orientación laboral, formación, intermediación e seguimento.
Estes itinerarios finalizan, na maioría dos casos, co acceso ao emprego e, noutros, cunha mellora significativa da empregabilidade e da autonomía persoal. Cáritas lanzou ademais unha mensaxe ás administracións públicas para que prioricen nos seus programas a figura da muller migrante e a súa inserción laboral a través de procesos integrais.
Os principais sectores de inserción continúan sendo o sector servizos —especialmente emprego doméstico, limpeza e coidados—, ademais de hostalaría, comercio e loxística.
