Unha muller que permanecía desaparecida desde a noite do venres foi atopada sen vida na mañá deste sábado en Porto do Son, concretamente na parroquia de Portosín.
Segundo informou o 112 Galicia, a alerta pola desaparición rexistrouse arredor das 22:00 horas. De inmediato activouse un operativo de busca no que participaron efectivos da Garda Civil e do GES de Noia, aínda que os primeiros rastrexos realizados durante a noite non deron resultado.
Xa na xornada deste sábado, o dispositivo retomouse coa incorporación da Unidade Operativa de Drons da Axencia Galega de Emerxencias, co obxectivo de ampliar a área de procura.
Finalmente, contra o final da mañá, foron uns veciños quen localizaron o corpo da muller nunha zona próxima a un regato. Os servizos de emerxencia desprazados ao lugar só puideron confirmar o falecemento, sen posibilidade de intervención para salvarlle a vida. As circunstancias do suceso están a ser investigadas.
