A Consellería do Mar ampliou un mes o prazo para a extracción de cría de mexilla en banco natural, estendéndoa excepcionalmente durante todo o mes de xuño tras alcordalo na Comisión do Mexillón.
A campaña, que remataría o 31 de maio, prorrogaase así para facilitar o abastecemento e garantir a produción das bateas galegas, segundo confirmou a conselleira Marta Villaverde nunha xuntanza na que tamén participou o director xeral de Pesca, Isaac Rosón.
O encontro serviu tamén para avanzar na elaboración do futuro Decreto de Acuicultura de Galicia, un marco normativo que o Goberno galego desenvolve conxuntamente co sector para consolidar a ordenación, sustentabilidade e modernización da acuicultura mariña.
Paralelamente, a Comisión analizou a evolución do episodio de biotoxinas que nas últimas semanas pechou todos os polígonos de mexillón. constátase unha tendencia favorable polo descenso da microalga Dinophysis acuminata, o que permitiu reabrir hoxe o polígono Sada 2 na ría de Ares-Betanzos e unha zona de extracción de moluscos infaunais na ría de Pontevedra.
Non obstante, os técnicos do Intecmar advirten de que as condicións meteorolóxicas actuais non favorecen a rápida renovación da auga nas rías, polo que o proceso de desintoxicación natural dos bivalvos será lento.
