O vindeiro sábado, 23 de maio, a Asociación Ambar das Persoas con Diversidade Funcional, en colaboración con Concomitentes, organizan un encontro aberto en Boiro (Terraza do Furancho, rúa Doutor Santos Mieites) a partir das 11:30 horas. O obxectivo desta xuntanza é xerar un espazo de diálogo e visibilidade que permita sumar novas persoas comitentes ao proxecto amais de celebrar o potencial do movemento para construír comunidade.
Cómpre dicir que o evento se enmarca no proceso de mediación do proxecto Interdependencias, unha iniciativa que busca estreitar lazos sociais, artísticos e de coidado na comarca.
Indo á xornada en cuestión, sinalar que arrancará ás 11:30h cunha mesa de conversa dirixida ás familias e á veciñanza da Comarca do Barbanza. Neste espazo debaterase sobre o impacto de Interdependencias a través das voces dos seus protagonistas: Fran Quiroga (director de Concomitentes), Natalia Balseiro (mediadora), Manu Mimé (responsábel de Arte de Ambar), Milagros Rey Pérez (presidenta de Ambar), as e os comitentes e persoas usuarias da entidade, Moisés Calvo e Sonia Alonso. Ás 12h, a quenda será para a acción e a música con Ghastas Pista RPM.
En resumo, trátase dun maratón de baile aberto a toda a cidadanía, que contará coa música de Rey DJ e a condución dos creadores Caterina Varela e Félix Fernández, integrantes da Asociación Ambar das Persoas con Diversidade Funcional.
Con esta proposta quérese converter o baile nunha ferramenta de expresión colectiva e de celebración dos afectos. O evento concluirá contra as 14h coa entrega de premios, o peche oficial da xornada e un vermú libre para todos os asistentes. Dende a organización convidan a toda a veciñanza do Barbanza e aos colectivos sociais e culturais da zona a achegarse e participar.
Programa:
• 11h30: Conversa aberta sobre o proxecto Interdependencias con dirección, mediadores e comitentes.
• 12h: Ghastas Pista RPM. Maratón de baile veciñal con Rey DJ e o Colectivo RPM.
• 14h: Entrega de premios, clausura e vermú libre.
