O director xeral de Gandaría, Agricultura e Industrias Agroalimentarias da Consellería do Medio Rural, José Balseiros, visitou este luns o concello de Muros para supervisar os traballos realizados no pasteiro de Santa Mariña de Esteiro, que contaron cun investimento próximo aos 75.000 euros.
A actuación abrangue unha superficie total de 10,8 hectáreas, divididas en dúas zonas nas que se levaron a cabo tarefas de acondicionamento como roza, pase de grada pesada, abonado e sementado. Ademais, instaláronse peches perimetrais co obxectivo de garantir o correcto uso e mantemento do espazo.
Durante a súa visita, Balseiros destacou que este tipo de intervencións resultan clave para o desenvolvemento do medio rural, ao contribuír á conservación da biodiversidade e dos ecosistemas agroforestais. Tamén subliñou o seu papel na prevención de incendios forestais e na dinamización da actividade económica local, ao facilitar espazos adecuados para a gandaría en extensivo.
Esta actuación enmárcase no Plan de Pastos de Galicia, impulsado pola Xunta para poñer en valor terras agrarias e reforzar o sector primario, promovendo un uso sustentable do territorio e mellorando as condicións para os profesionais do campo.
