A Comisión de Festas de Exipto organizará o vindeiro 15 de maio a Pequena Romaría de Exipto (Boiro), en colaboración co CEIPP de Abanqueiro, nunha iniciativa pensada para achegar a tradición, a música e a historia da romaría ás novas xeracións.
A actividade desenvolverase entre as 10:30 e as 13:00 horas e contará coa participación do alumnado, profesorado e familias que desexen asistir. Durante a mañá realizaranse diferentes obradoiros relacionados coa cultura e identidade da romaría, entre eles actividades de baile, instrumentos tradicionais e historia da celebración.
Ademais, celebrarase un concurso de debuxo coa colaboración de JEALSA a través do seu programa de RSC We Sea, no que os traballos gañadores serán publicados na tradicional Folla Parroquial da Romaría de Exipto, que verá a luz durante a celebración da romaría na primeira fin de semana de agosto. Todos os debuxos participantes tamén estarán expostos no Monte de Exipto durante esas xornadas festivas.
A xornada rematará arredor das 12:30 cunha pequena merendola para todas as persoas asistentes, que contará con empanadas doadas por Chicolino e froita cedida por Mi Frutería.
A música correrá a cargo da Agrupación Tradicional A Dorniña de Abanqueiro, que amenizará a mañá nun encontro pensado para compartir tradición, convivencia e comunidade.
“Desde a Comisión de Festas destacamos a importancia de manter viva a esencia da Romaría de Exipto tamén ao longo do ano e de transmitir ás crianzas o valor dunha celebración con máis de cen anos de historia, profundamente ligada á parroquia de Abanqueiro e á súa veciñanza”, informaron dende a Comisión, que lembra que a seguinte actividade organizada pola entidade veciñal será a Foliada de Exipto, que se celebrará o vindeiro sábado 30 de maio a partir das 19:30 horas no Centro Social de Abanqueiro. A cita contará con actuacións de diferentes grupos de música tradicional galega, ademais do xa tradicional bocata de luras, presente nas edicións anteriores. A festa rematará coa sesión do DJ Suso Jalaiko, encargado de pechar unha noite pensada para seguir facendo comunidade arredor da música e da tradición popular galega.
