A décimo novena edición da Copa Sálvora reunirá a 71 equipos de fútbol base no estadio municipal da Fieiteira, en Ribeira, consolidándose como unha das citas deportivas máis destacadas do calendario local.
O torneo disputarase en dúas fins de semana: o 30 e 31 de maio, con 55 equipos de fútbol 8, e o 6 e 7 de xuño, coa participación de 16 conxuntos de fútbol 11, abranguendo así todas as categorías base.
O concelleiro de Deportes, Álex Vidal, salientou a importancia dunha competición que reúne a nenos e nenas de toda Galicia e que está “moi consolidada no calendario municipal”. Ademais, agradeceu o traballo do Cidade de Ribeira na organización e na promoción do deporte entre a mocidade, lembrando que “o deporte é saúde”.
Pola súa banda, o presidente do Cidade de Ribeira, Miguel Ángel González, destacou o nivel do torneo e anunciou a participación do equipo alevín do Celta. Tamén puxo en valor o esforzo organizativo que require o evento e amosou o seu desexo de que o club anfitrión poida facerse coa vitoria na categoría infantil.
