A experiencia non sempre é garantía de sabedoría e boa xestión. Proba diso son moitos dos nosos gobernantes que incorren, unha e outra vez, nos mesmos erros e logo quéixanse da herdanza recibida.
En política social e económica non todo vale. As receitas non sempre funcionan. Queda moito por descubrir e innovar. As persoas teñen que ser o obxectivo primordial de calquera formación política ou equipo de goberno, tanto en época electoral como durante toda a lexislatura.
Pola súa banda os mozos non poden seguir deixando en mans dos seus avós, pais ou persoas de certa idade o futuro das súas vidas e a dos seus descendentes. Está demostrado que hai cousas que non funcionan e hai que cambialas. En política non sempre todo é branco ou negro, tamén existen visións diferentes.
O futuro non pode quedar hipotecado polo pasado. Moito mozos chegan con novas ideas para dar resposta a vellas situacións adversas. Problemas enquistados que requiren unha sabia nova, valentía e ganas de traballar polo ben común e contra a desigualdade, a inxustiza e o progreso.
A mocidade mellor preparada da historia non pode seguir vivindo asentada na apatía e a desesperanza. Teñen que ser os verdadeiros protagonistas do futuro, tomando decisións con firmeza e valentía. Demostrando, á vella garda dos partidos políticos e á sociedade en xeral, que hai outras maneiras de gobernar, diferentes ás tradicionais. Teñen o dereito e a obrigación de sacar o billete e subirse ao tren do futuro ata chegar ao destino anhelado.
