A xornada do xoves 30, virá marcada por un tempo variable nas Rías Baixas e na área de Santiago, nun contexto de certa inestabilidade atmosférica.
Durante a mañá, predominarán os ceos con abundante nubosidade, especialmente nas Rías Baixas, onde non se descartan precipitacións febles e ocasionais. Co avance do día iranse abrindo claros, deixando unha tarde máis luminosa en xeral.
En Santiago e no interior próximo, a situación será semellante, con nubes a primeiras horas e tendencia á mellora, aínda que non se descarta algún chuvasco illado pola tarde. As temperaturas mínimas descenderán lixeiramente, mentres que as máximas se manterán sen grandes cambios (17 a 19 graos). O vento soprará frouxo do sur-suroeste, con intervalos moderados no litoral das Rías Baixas.
O noso mar: Vento do sur á mañá, do sudoeste á tarde e do sueste á noite, forza 3 a 4 á mañá, 1 a 3 á tarde e 1 a 2 á noite. Marusía á mañá, mar ovellado á tarde e mar rizado á noite. Visibilidade boa. Mar de fondo do noroeste, con ondas de 2 a 2.5 metros.
