O coordinador de UCIN Galicia, José Luis Calo, insta á Xunta de Galicia a rectificar o seu plan de modificación de horarios nos Puntos de Atención Continuada (PAC) e a “apostar por unha solución estrutural que garanta a asistencia sanitaria en todo o territorio galego”. Desde UCIN Galicia alertan de que a reorganización prevista polo Servizo Galego de Saúde podería afectar a arredor de 20-30 PAC, especialmente en zonas rurais, o que suporía “un recorte encuberto de servizos básicos e un aumento das desigualdades territoriais”, indica Calo, engadindo que “non é un problema só de horarios, é de planificación”.
Calo sinala que a falta de profesionais sanitarios non pode resolverse unicamente con cambios organizativos: “Reducir horarios nos PAC non soluciona o problema, trasládao á cidadanía, especialmente a quen vive no rural”.
Proposta de UCIN Galicia: plan en tres eixes
-Reordenación do gasto público: auditoría de ente instrumentais e estruturas administrativas, eliminación de duplicidades dentro da administración autonómica, reasignación de recursos cara á sanidade pública (obxectivo é liberar ata 20 millóns de euros para reforzo sanitario).
-Plan urxente de captación de profesionais: incentivos económicos para prazas de difícil cobertura, mellora das condicións laborais nos PAC (quendas, descansos, estabilidade) e programas para atraer médicos novos e facilitar o retorno de profesionais.
-Garantía de asistencia no rural: mantemento dos PAC actuais sen recortes de horario, reforzo con equipos móbiles en zonas dispersas e uso da telemedicina como complemento, non substitución.
Desde UCIN Galicia lembran que o sistema sanitario debe garantir igualdade de acceso: “Non pode haber galegos de primeira e de segunda segundo o seu código postal. O rural non pode seguir pagando a falta de planificación”.
Ademais, o grupo solicita á Xunta a apertura dunha mesa de traballo con: profesionais sanitarios, asociacións de pacientes e representantes municipais co obxectivo de acadar unha solución “realista, sostíbel e centrada nas persoas”.
“Galicia precisa unha estratexia sanitaria a medio e longo prazo, non parches. Hai marxe para mellorar a xestión pública sen recortar dereitos”, concluíu José Luis Calo.
