O coordinador de UCIN Boiro, Miguel Piqueras, rexistrou este martes 28 de abril unha denuncia formal ante a Consellería de Política Social da Xunta de Galicia polo “estado de abandono no que se atopa”, sinalan, a Escola Infantil A Galiña Azul do Saltiño. A formación esixe “unha intervención inmediata” tras analizar os testemuños e as fotografías facilitadas polas nais e pais, que revelan un estado de “abandono sistemático” e, tamén, “deficiencias estruturais” que cualifican como unha “trampa mortal” para menores de 0 a 3 anos.
Sinalar que a rede de Escolas Galiña Azul dependen directamente da Xunta, concretamente a través das seguintes entidades: o Consorcio Galego de Servizos de Igualdade e Benestar (Consellería de Política Social e Igualdade), tal e como é o caso da escola do Saltiño. Malia esta titularidade autonómica, en UCIN Galicia consideran que o mantemento é competencia directa do Concello.
UCIN Boiro di que hai eivas graves en materia de risco eléctrico e de cristalería, e que existen picaportes nas portas soltos, pingueiras sobre os cambiadores e elementos de xogo con puntas de ferro á vista. “A isto engádese o mal estado dos baños, actualmente avariados” e, tamén, a falta de mantemento de patios, que están cubertos de verdello e que poden entrañar un risco de caídas, sinalan.
