O coordinador de UCIN Boiro, Miguel Piqueras, rexistrou no Concello unha proposta para a creación dunha praia canina no municipio, acompañada dun enfoque claro: que sexa a propia veciñanza quen decida o seu empranzamento mediante un proceso de participación cidadá, “baseado en alternativas previamente estudadas”. Explican que a iniciativa xorde “nun contexto no que Boiro leva anos sen avances nesta materia, a pesar de tratarse dun servizo cada vez máis habitual en concellos do entorno”. A agrupación considera que a proposta recupera un debate que xa xerou polémica no municipio: “En 2020, o intento de habilitar o acceso de cans á praia de Piñeirón-Gavioteira provocou críticas entre usuarios e evidenciou a falta de consenso e planificación”, sinalan, engadindo que “este antecedente demostra que sen participación cidadá, as decisións neste ámbito están condenadas ao conflito”.
E engaden: “Se existen varias opcións viábeis, o máis lóxico é que sexan os veciños quen decidan; esa é a mellor maneira de evitar problemas e garantir que a decisión sexa aceptada”.
O grupo sostén que ” Boiro leva demasiado tempo sen dar pasos nun ámbito no que outros municipios xa teñen solucións en marcha. Agora é o momento de decidir: ou se actúa ou haberá que explicar por que seguimos igual”.
A formación insiste en que a creación dunha praia canina é “perfectamente compatíbel coa convivencia e co respecto ao entorno, sempre que se faga con criterio e planificación”. Por iso, defende que o seguinte paso debe ser abrir un proceso transparente no que se presenten distintas alternativas e se dea voz á cidadanía.
