A Asociación Española Contra o Cancro (AECC) de Ribeira celebrou unha emotiva gala na que se puxo en valor o labor solidario de persoas e colectivos implicados na loita contra a enfermidade. O acto contou cunha ampla asistencia de público e co respaldo institucional, entre eles o conselleiro de Sanidade, Antonio Gómez Caamaño e a alcaldesa ribeirense María Sampedro e membros da corporación.
Durante o evento, foron distinguidos Juan Luis Martínez entrenador nacional de Taekwondo e a asociación cultural Barbantia, entre outros homenaxeados, polo seu compromiso e contribución en diferentes ámbitos. A gala serviu tamén para destacar o papel do voluntariado e o apoio constante aos pacientes e ás súas familias.
No caso de Juan Luis Martínez, recoñeceuse a súa traxectoria, mentres que de Barbantia se salientou o seu labor de dinamización cultural e social, así como a súa colaboración en iniciativas solidarias.
Tamén foi galardoado o oncólogo Luis Ángel León, do que a AECC enxalzou o seu “intenso labor de humanización” no tratamento das enfermidades oncolóxicas e o seu traballo de investigación. Destacou a importancia da prevención con controis e hábitos de vida saudables. Ao acto asistiu o conselleiro de Sanidade, Antonio Gómez Caamaño, quen puxo en valor o labor da AECC de Ribeira no acompañamento aos pacientes que sofren un proceso oncolóxico e no apoio ás súas familias.
A xornada estivo marcada por intervencións emocionadas e mensaxes de agradecemento, nas que se puxo de relevo a importancia da colaboración cidadá e institucional na loita contra o cancro. A AECC de Ribeira subliñou que actos como este permiten visibilizar o traballo realizado ao longo do ano e reforzar o compromiso colectivo fronte á enfermidade.
