Que lle ocorre ao Conselleiro de Sanidade e demais membros da Consellería de Sanidade da Xunta de Galicia ante a precariedade e deficiencias na xestión da asistencia sanitaria pública dos centros de saúde ou de atención primaria de Ribeira e A Pobra, así como sobre a demora das citas médicas no Hospital Comarcal da Barbanza?
Desde a Plataforma en favor da Sanidade Pública do Barbanza e centenares de usuarios levan solicitando un encontro con algún responsable da Consellería, desde hai máis de dous anos, e ata a data non recibiron resposta algunha, sendo unha falta de respecto e incumprimento das súas obrigas, como servidores públicos.
Non se entende como a Consellería de Sanidade da Xunta de Galicia está precarizando e desmantelando a Sanidade Pública en favor da sanidade privada e os concertos con clínicas privadas, actuando como meras mutuas no canto de funcionar como unha Administración Pública, ao servizo de todos os cidadáns sen ningún tipo de discriminación.
Os veciños da Comarca do Barbanza merecemos moito máis respecto e consideración que o ofertado, ata o momento, polo señor conselleiro de Sanidade. Non se pode xestionar o público, o de todos, con tanta prepotencia e desconsideración, hai que ser máis empático e receptivo cara ás xustas demandas e necesidades dos cidadáns.
