Portos de Galicia executará obras de reparación nas ramplas de acceso ao mar dos peiraos de Castiñeiras e Corrubedo, no municipio de Ribeira, así como na de Ancados, en Boiro.
O organismo, dependente da Consellería do Mar, vén de recibir os informes preceptivos de compatibilidade coa estratexia mariña por parte do Ministerio para la Transición Ecológica y el Reto Demográfico, necesarios para poder levar a cabo estas actuacións. Estes informes foran solicitados en outubro de 2024.
As intervencións teñen como obxectivo garantir a seguridade e operatividade das infraestruturas portuarias, fundamentais para a actividade do sector pesqueiro profesional na comarca do Barbanza.
Os traballos consistirán no saneado de bordos e fendas das ramplas, así como no seu posterior recheo con morteiro especial, co fin de nivelar a superficie e mellorar as condicións de uso.
As obras executaranse respectando as limitacións ambientais establecidas polo Ministerio para a protección da fauna da zona. No caso da rampla de Castiñeiras, non poderán realizarse entre os meses de xuño e outubro, recomendándose a súa execución durante novembro ou decembro.
