O polbo galego vive os seus últimos días nas prazas e peixerías antes do inicio do paro biolóxico, que prohibirá a súa captura entre o 1 de maio e o 1 de xullo co obxectivo de protexer a especie en pleno período de desova.
A proximidade da veda está a provocar un aumento notable da demanda, co produto esgotándose a gran velocidade nos postos de venda. “Ás once da mañá xa non queda polbo”, sinala unha peixeira da praza de Lugo da Coruña, reflexo da alta demanda destes días previos.
Os profesionais do sector confirman o incremento das vendas. Algúns chegan a despachar arredor de 40 quilos diarios, unha cifra que evidencia o interese da clientela por facerse con polbo galego antes de que desapareza temporalmente do mercado.
Durante os dous meses de veda, quedará totalmente prohibida a captura, comercialización e consumo de polbo galego fresco, polo que o produto dispoñible procederá doutros mercados, algo que moitos consumidores consideran de menor calidade.
Ante esta situación, moitas familias optan por mercar varias pezas e conxelalas para garantir subministración durante as semanas sen actividade extractiva. “Hai quen leva dous, tres ou máis polbos para ter para todo o verán”, explican desde as peixerías.
Ademais, desde o sector lembran que o polbo que regrese ao mercado en xullo pode presentar unha calidade inferior nas primeiras semanas, ao atoparse aínda en proceso de recuperación tras a desova.
Con esta parada biolóxica, Galicia busca garantir a sustentabilidade dunha das súas especies máis emblemáticas, asegurando a súa reprodución e a continuidade da actividade pesqueira no futuro
