O director xeral de Pesca, Acuicultura e Innovación Tecnolóxica, Isaac Rosón, visitou este mércores 29 de abril o CPR Plurilingüe La Milagrosa de Vigo para participar na xornada Mexillón de Galicia nas aulas. Esta actividade, organizada pola Denominación de Orixe Protexida (DOP) Mexillón de Galicia, ten como finalidade achegar aos escolares as bondades nutricionais, a calidade e a historia dun dos produtos máis senlleiros do noso mar.
Durante o encontro, Rosón destacou a importancia de educar ás novas xeracións no consumo de produtos locais e sustentábeis. A acción enmárcase no convenio de colaboración subscrito este ano entre a Consellería do Mar e a DOP, unha alianza estratéxica que busca “non só promocionar o consumo de mexillón, senón tamén divulgar o rigoroso proceso de control e certificación que garante a súa excelencia”.
A xornada permitiu aos alumnos e alumnas coñecer de preto o ciclo de produción do mexillón e a súa relevancia como motor económico das rías galegas. O director xeral subliñou que “este tipo de iniciativas son fundamentais para consolidar a dieta atlántica nas idades temperás e para que a mocidade recoñeza o esforzo dos profesionais do sector bateeiro, asegurando así a remuda xeracional tamén no consumo”.
