Obarbanza.gal: Galicia quedará este mércores nunha situación de transición entre unha borrasca situada nas Azores e un anticiclón ao norte de Escocia, o que traerá unha xornada en xeral estable, aínda que con cambios nas temperaturas.
Nas primeiras horas poderán formarse bancos de néboa illados, tanto en zonas do interior como en vales próximos a Santiago, que irán levantando co avance da mañá. A partir de aí, predominarán os ceos con nubes altas que permitirán o paso do sol, deixando unha xornada luminosa tanto na capital galega como no conxunto das Rías Baixas.
O aspecto máis destacado será o descenso das temperaturas. A baixada será moderada en xeral, pero especialmente notable na metade oeste, onde se inclúen as Rías Baixas e Santiago, con caídas que poderían superar os sete graos respecto a días anteriores.
En canto ao vento, soprará frouxo de compoñente sur durante a mañá, con algo máis de intensidade no litoral. Xa pola tarde, tenderá a virar a nordés, mantendo en xeral unha intensidade moderada na costa.
En conxunto, será un día de tempo máis estable e soleado, pero con ambiente máis fresco, sobre todo na franxa atlántica galega.
O noso mar: Vento do sur e marusía marcarán a xornada no litoral das Rías Baixas
Rías Baixas.- A situación marítima para a xornada vén marcada por vento de compoñente sur durante a mañá, rolando a sudoeste pola tarde e quedando variable xa pola noite. A intensidade oscilará entre forza 3 e 5 nas primeiras horas do día, baixando a 3-4 pola tarde e amainando notablemente ata forza 1-2 durante a noite.
No que respecta ao estado do mar, agárdase marusía tanto pola mañá como pola tarde, tendendo a mar rizado na noite a medida que diminúe a intensidade do vento. A visibilidade será boa en xeral ao longo de toda a xornada.
En canto ao mar de fondo, predominará o compoñente noroeste durante a mañá, virando a oeste pola tarde e mantendo esa dirección durante a noite. A altura das ondas situarase entre 1 e 2 metros pola mañá e pola noite, mentres que pola tarde descenderá ata valores de entre 0,5 e 1,5 metros.
