O Consorcio de Santiago publicou este luns na Plataforma de Contratación do Sector Público dúas novas licitacións destinadas á execución de intervencións en dous dos espazos de maior valor patrimonial da cidade: o conxunto de Santo Domingo de Bonaval e o Pazo de Raxoi.
No caso de Bonaval, a actuación céntrase na restauración da nave de acceso ao Panteón de Galegas e Galegos Ilustres, así como na capela que alberga o sepulcro de Castelao. O proxecto contempla unha intervención integral para corrixir as patoloxías detectadas, entre as que destacan problemas de humidades, filtracións e o deterioro de revestimentos e pinturas murais. O obxectivo é recuperar as condicións de conservación do espazo e garantir a protección dos seus valores históricos e artísticos. O orzamento base de licitación, IVE incluído, ascende a 122.829,34 euros e o prazo de presentación de ofertas permanecerá aberto ata o 11 de maio de 2026.
Pola súa banda, a intervención prevista no Pazo de Raxoi está orientada á mellora da eficiencia enerxética da súa fachada norte. Os traballos buscan optimizar o comportamento térmico da envolvente do edificio e solucionar deficiencias derivadas do envellecemento dos materiais e da acción de factores ambientais, como humidades, filtracións e problemas de estanqueidade. Esta actuación conta cun orzamento base de 617.856,76 euros, IVE incluído, e o prazo para presentar ofertas remata o 18 de maio de 2026.
Estas iniciativas enmárcanse na estratexia do Consorcio de Santiago para a conservación e posta en valor do patrimonio histórico da cidade, ao tempo que se aposta pola mellora da eficiencia e sustentabilidade dos seus edificios emblemáticos.
