O Concello de Noia vén de iniciar os traballos de mellora do firme na rúa Pontevedra, unha actuación que conta cun investimento total de 30.000 euros e que será executada pola empresa local Pavimentos Noia SL. Dende o Goberno local explican que “esta intervención ten como obxectivo principal renovar o pavimento existente, mellorar a seguridade viaria e optimizar a accesibilidade para a veciñanza”.
Ademais da renovación do firme, o proxecto inclúe a mellora das beirarrúas, “contribuíndo a un tránsito peonil máis cómodo e seguro”.
O tenente de alcalde, Manolo Seijas, destacou a importancia desta actuación dentro do plan municipal de mantemento e mellora das infraestruturas urbanas: “Seguimos apostando por intervencións que melloren a calidade de vida da cidadanía, actuando en vías que precisaban unha renovación evidente”.
Con esta obra, o Concello reafirma o seu “compromiso” coa posta a punto dos espazos públicos e co apoio ás empresas locais, encargadas de executar os traballos.
Os labores desenvolveranse durante os vindeiros días, polo que se solicita a colaboración da veciñanza ante posíbeis molestias ocasionadas polas obras.
