A iniciativa Namórate da Aldea chega o vindeiro 18 de abril a Araño (Rianxo) cunha completa xornada de natureza, gastronomía e cultura.
A Área Recreativa As Miráns, en Campo da Ponte (Araño, Rianxo), acollerá o vindeiro 18 de abril, a partir das 16.00 horas, o evento Namórate da Aldea, unha proposta pensada para poñer en valor o rural a través dunha experiencia que combina natureza, tradición, gastronomía e lecer para todos os públicos.
A programación comezará ás 16.00 horas cunha andaina guiada, seguida ás 17.00 horas dunha experiencia gastronómica a cargo do cociñeiro Alberto Carou, do restaurante O Curral do Marqués.
Durante esta sesión, as persoas asistentes poderán desfrutar dunha degustación de tapas con produtos e receitas representativas da zona, como bocadillos de rexóns, queixo San Simón con salsa brava, ensaladilla ou kebab de costela de porco con chimichurri e queixo.
Ademais, o evento contará cunha degustación de viño e vermú das bodegas Cazapitas Lodeiros, así como cun concurso de licores caseiros, promovendo así a tradición e a participación veciñal.
A programación inclúe tamén actividades para o público máis novo, como o teatro infantil Calavera Circus ás 18.00 horas, garantindo unha xornada pensada para toda a familia.
Como peche do evento, ás 20.00 horas terá lugar o concerto do grupo Minguante, que poñerá o broche final a unha tarde chea de cultura e convivencia.
Namórate da Aldea é unha iniciativa que busca dinamizar o territorio, apoiar o produto local e fortalecer os lazos comunitarios, ofrecendo unha alternativa de lecer sostíbel e de calidade no rural.
Máis información: Data: 18 de abril
Lugar: Área Recreativa As Miráns, Campo da Ponte (Araño, Rianxo)
Hora de inicio: 16.00 h
Organiza: Asociación Cultural A Carballeira de Baia
