Máis de medio cento de mariscadoras e mariscadores de Muros levan días traballando intensamente na limpeza manual da praia da Virxe, un dos principais bancos marisqueiros da zona, afectado por unha inusual e masiva acumulación de algas.
A presenza destas algas está a comprometer seriamente a supervivencia de especies como o berberecho e a ameixa. Segundo explican desde o sector, as algas engánchanse aos moluscos e, co movemento das mareas, acaban desenterrándoos e arrastrándoos á superficie, onde moitos morren.
Ante esta situación, os profesionais optaron por unha limpeza completamente manual, retirando as algas unha a unha. A decisión responde á necesidade de protexer as crías e os exemplares máis pequenos, que poderían verse gravemente afectados polo uso de maquinaria ou ferramentas máis agresivas.
Aínda que outros bancos marisqueiros galegos tamén están a sufrir os efectos deste fenómeno, en Muros destaca o esforzo colectivo por preservar o recurso con métodos respectuosos. Trátase dun labor minucioso e lento, que se prolongará, previsiblemente, durante polo menos dúas semanas máis.
A campaña extractiva, prevista para o mes de xuño, está agora en risco debido á magnitude desta floración, que os profesionais cualifican de excepcional. “Nunca viramos tantas algas como nesta ocasión”, sinalan.
O sector confía en que o traballo realizado permita salvar a campaña, aínda que recoñece a incerteza sobre a evolución da situación nas próximas semanas.
