A xornada do martes estará condicionada pola presenza dun centro de baixas presións situado entre Azores e Galicia, o que deixará unha situación de marcada inestabilidade atmosférica.
Nas Rías Baixas e en Santiago, o día comezará con alternancia de nubes e claros, aínda que co avance das horas medrará a nubosidade e aumentará a probabilidade de chuvascos, especialmente a partir do mediodía. Estas precipitacións poderán ir acompañadas de treboadas de xeito puntual.
As temperaturas experimentarán un moderado ascenso, máis acusado no litoral, onde o ambiente será algo máis suave ca en xornadas anteriores. En Santiago tamén se notará esta subida, aínda que de forma máis moderada (24 a 26 graos).
O vento soprará frouxo de compoñente leste nas primeiras horas, rolando a sur e intensificándose pola tarde, cando poderá acadar intervalos de moderado. Aínda que as refachas máis fortes se esperan nas zonas montañosas do leste da provincia de Ourense, nas Rías Baixas tamén se poderá notar un incremento da intensidade do vento ao final do día.
O noso mar: vento do sur á mañá e á tarde e do sudoeste á noite, forza 3 a 5 á mañá, 4 a 5 á tarde e 2 a 3 á noite. Marusía á mañá, forte marusía á tarde e mar ovellado á noite. Visibilidade boa. Mar de fondo do noroeste, con ondas de 1 a 2 metros á mañá, 1.5 a 2.5 metros á tarde e 2 a 3 metros á noite.
