Un menor resultou ferido leve este mércores tras ser atropelado por un vehículo mentres cruzaba por un paso de peóns acompañado do seu pai no municipio de Boiro.
O accidente produciuse ás 12.42 horas na avenida de Compostela, á altura do Bar Touliña, segundo informou o 112 Galicia tras recibir o aviso dun particular.
De acordo con fontes do servizo municipal de emerxencias, o menor atopábase cruzando a vía xunto ao seu proxenitor no momento do impacto e, a pesar do suceso, o seu estado non revestía gravidade.
Ata o lugar desprazáronse efectivos da Policía Local, Protección Civil, Bombeiros de Boiro e persoal do Servizo de Urxencias Sanitarias-061. Tras unha primeira atención no punto, o neno foi evacuado en ambulancia ao Hospital do Barbanza para a súa valoración médica.
