Afundación levou o seu proxecto Plantando árbores con pinceis ao IES Nº 1 de Ribeira, onde rapaces e rapazas de 1º e 3º de ESO elaboraron un mural con pinturas fotocatalíticas anticontaminantes e decoraron tamén bolsas de tea con pinturas ecolóxicas. A iniciativa enmárcase no programa da Obra Social de Abanca Educación para a sostibilidade, que obtivo en 2024 o premio nacional de Medio Ambiente de CECA. Nesta proposta artística e ambiental o alumnado aprende que o uso deste tipo de pigmentos é útil dado o seu poder de absorción dos gases contaminantes derivados do tráfico e das industrias, fomentando a creación de espazos escolares ecoloxicamente máis depurados grazas á implicación das mozas e mozos do centro.
En palabras de Abanca, estamos ante “unha innovadora iniciativa que ten como obxectivo achegar ao estudantado unha mensaxe positiva sobre o coidado da contorna, propoñendo alternativas de lecer que fomentan o respecto ao medio natural a través da arte, cunha metodoloxía participativa e colaborativa”.
O proxecto consiste en coordinar ao alumnado participante para realizar un mural, con estas pinturas e con temáticas relacionadas co medio ambiente, na parede que designe o centro escolar. A actividade complétase con obradoiros de pintado de bolsas de tea nos que se traballará a temática ambiental desde un enfoque participativo, o que facilita a toma de conciencia sobre a importancia de coidar da natureza.
Como novidade nesta edición incorpórase un taller de estampaxe no que o alumnado participante realiza un modelo relacionado co coidado do medio ambiente que posteriormente se estampará en distintas localizacións de cada centro.
Desde que se iniciou o proxecto en 2021 e, unha vez finalice esta quinta edición, máis de 19.000 escolares e docentes pintarían máis de 200 murais en centros educativos de toda Galicia.
