Axentes da Policía Nacional Adscrita de Galicia esclareceron tres incendios forestais rexistrados a finais de marzo nos concellos de Boiro e Boborás, todos eles provocados por queimas de restos agrícolas realizadas sen as medidas de seguridade necesarias.
A investigación foi levada a cabo polo Grupo de Incendios da unidade en Ourense e Santiago, coa colaboración da Unidade de Investigación de Incendios Forestais, dependente da Consellería do Medio Rural no caso dos lumes de Boiro.
Os dous incendios rexistrados en Boiro, no lugar de Lampón, tiveron lugar os días 23 e 24 de marzo e afectaron 1,8 hectáreas de monte arborado e raso e 0,17 hectáreas de superficie non forestal. Ambos obrigaron á mobilización de medios de extinción para evitar a súa propagación. As dúas persoas implicadas foron identificadas e declararon como investigadas, remitíndose as dilixencias ao xulgado de garda de Ribeira.
Pola súa banda, o incendio de Boborás produciuse o 22 de marzo no núcleo de Vecoña de Arriba, afectando arredor de 0,17 hectáreas de superficie arborada. O lume foi extinguido por efectivos da Xunta, coa intervención dun axente forestal, unha brigada e unha motobomba. A Policía Nacional Adscrita de Galicia identificou unha persoa como presunta responsable, que tamén foi citada como investigada. As actuacións foron remitidas ao xulgado de instrución do Carballiño.
Desde a administración autonómica lémbrase que as queimas de restos agrícolas e forestais están actualmente suspendidas de maneira temporal en Galicia como medida preventiva.
A Xunta fai un chamamento á responsabilidade cidadá para evitar incendios forestais e lembra que, en caso de detectar lume, está dispoñible o teléfono de emerxencias 085, así como o número anónimo 900 815 085 para denunciar actividades incendiarias.
