O Concello de Rianxo informou da adxudicación da segunda fase do proxecto que permitirá renovar a totalidade das luminarias do paseo marítimo.
Nesta segunda fase, que conta cun investimento de uns 40.000€, cambiarase o tramo comprendido entre A Carballeira e a praia do Pazo. As luminarias actuais cambiaranse por outras de maior eficiencia enerxética que empregarán tecnoloxía LED.
Na primeira fase renovouse o tramo comprendido entre Setefogas e A Carballeira instalando luminarias de maior eficiencia enerxética.
Ademais, o Concello recibiu a resolución favorábel da Deputación da Coruña para iniciar o trámite de licitación da terceira e última fase do proxecto.
“Así as cousas e se non xurde ningún imprevisto, o vindeiro inverno teremos cambiada toda a iluminación do paseo marítimo”, engadiu o rexedor, apuntando que “ademais, xa aprobamos dous proxectos para comezar o antes posíbel co cambio de firme de toda a zona que na actualidade está empedrada. Estes dous proxectos suman un investimento total de 457.024,26 euros”.
