Arqueolladas, Tremuzo Historia e Patrimonio, Historia de Galicia e o proxecto ULA Libraría Social veñen de unir forzas pola creación literaria e polo impulso de novos talentos (ou non tan novos). O resultado é o Concurso de Relatos “O Castelo de Outes”, un certame literario para todas as idades que tamén pretende dar a coñecer “un espazo arqueolóxico e de gran importancia histórica que dá orixe ao concello de Outes”. E engaden: “Pensamos que facer parte á comunidade de xerar historias ao redor do Castelo era unha formar estupenda de relacionarnos de xeito máxico coa histórica construción e darlle a relevancia que merece”.
Ademais, a entrega de premios será no propio Castelo o 13 de xuño, “onde desfrutaremos dunha ruta e explicación arqueolóxica”, sinalan.
Quen precise máis información tena no local da ULA (na rúa da Capela na Serra) ou a través do correo castelodeoutes@outlook.es.
As bases do certame están dispoñíbeis na web da ULA Libraría Social.
