Dúas persoas resultaron feridas logo de envorcar un camión pequeno tras saírse da vía na AC-550, ao seu paso polo lugar de San Mamede, no municipio de Carnota.
O accidente produciuse arredor das 10.30 horas, segundo informou o 112 Galicia, que recibiu o aviso dun particular. No momento da chamada indicábase que o vehículo se atopaba fóra da calzada e que había dúas persoas xa no exterior.
Ata o lugar desprazouse persoal do Servizo de Urxencias Sanitarias de Galicia-061, que procedeu á evacuación dos dous feridos, cuxo estado non transcendeu.
No operativo participaron tamén efectivos da Garda Civil de Tráfico, da Policía Local, do GES de Muros e voluntarios de Protección Civil da localidade.
Á súa chegada, os equipos de emerxencia solicitaron a intervención de servizos de limpeza debido á presenza de pedras e terra derramadas sobre a vía. Ademais, os membros do GES sinalizaron un dos carrís con conos, xa que o camión quedou semi envorcado na cuneta e ocupaba parte da calzada, á espera da súa retirada cun guindastre.
