A xornada do domingo de Resurrección manterá a estabilidade atmosférica en Galicia, que continuará baixo a influencia das altas presións.
Durante as primeiras horas do día serán frecuentes as néboas nas comarcas do interior, mentres que no resto predominarán as nubes de tipo medio e alto, que non impedirán o paso do sol. Ademais, existe posibilidade de brétemas costeiras no litoral atlántico durante a primeira metade da xornada.
No que respecta ás temperaturas, as mínimas experimentarán un lixeiro descenso, mentres que as máximas se manterán sen grandes cambios, aínda que poderán baixar algo no terzo norte da comunidade.
En canto ao vento, soprará frouxo de dirección variable, tendendo a establecerse do norte-nordés pola tarde.
O noso mar: vento do norte á mañá, do noroeste á tarde e do leste á noite, forza 1 a 3 á mañá e á tarde e 1 a 2 á noite. Mar ovellado á mañá e á tarde e mar rizado á noite. Visibilidade regular á mañá e boa á tarde e á noite. Mar de fondo do noroeste, con ondas de 2.5 a 3.5 metros á mañá e á tarde e 2 a 3 metros á noite.
