A Asociación para a Defensa Ecolóxica de Galicia (ADEGA) celebra cunha mostra itinerante, inaugurada o venres na praza do concello de Lalín, os “50 anos coidando a terra”, como exemplo dun compromiso asumido responsablemente que agora se expresa por medio de relatos e imaxes de feitos que, a día de hoxe, forman parte da historia que se repasa ao través de fitos e mobilizacións ecoloxistas que máis pegada deixaron no país e que influíron de xeito máis evidente no presente e no noso devir futuro.
Após recalar en concellos como Carballo, Muros, Arzúa, Valdoviño, Lugo, A Coruña, Ourense ou Santiago, a exposición fai parada estes días en Lalín para pór en valor as loitas ambientais que ten
desenvolvido na comarca do Deza e as súas posicións fronte a numerosos episodios de espolio do territorio ao longo deste medio século.
A oposición aos encoros do Ulla e á incineradora do Irixo ou a defensa das fragas de Catasós, o proxecto de Altri e as plantas de biometano ou biogás, son algúns dos eixos que sosteñen e marcan a traxectoria de ADEGA. Con elas, os proxectos Ríos e Cerna, a custodia do territorio cas sobreiras do Arnego e na Eira da Xoana, onde se levan a cabo actividades como a recuperación de saberes e oficios tradicionais, o programa de compostaxe caseira en Goiás (Lalín).
A exposición estrutúrase en 16 paneis distribuídos en catro tótems cúbicos , acompañados de bidóns simbólicos que recrean materiais radioactivos e textos e imaxes das principais ameazas ambientais ás que se enfrontou Galicia nos últimos 50 anos.
Falar hoxe en día de ADEGA é repasar a historia das máis duras, fortes e razoadas protestas contra decisións moitas veces políticas tomadas a conciencia porque os instigadores das mesmas sabían -e saben- dos prexuízos que as mesmas causarían a Galicia.
