A compañía CONGALSA participará na nova edición do Salón Gourmets, que se celebra do 13 ao 16 de abril en Madrid, e en Seafood Expo Global, que terá lugar na cidade de Barcelona do 21 ao 23 de abril. En ambos os foros presentará as súas últimas innovacións e a ampliación do seu catálogo gourmet con novas referencias de Yatecomeré e solucións da súa marca Ibercook.
Especializada en produtos do mar conxelados e solucións de valor engadido para o ámbito retallista e o foodservice, CONGALSA aproveitará a súa presenza nestas prestixiosas feiras para mostrar a súa evolución cara a propostas de maior valor gastronómico, aliñadas coas tendencias do mercado e as necesidades da canle profesional.
Como principal novidade, a compañía dará a coñecer a ampliación do seu catálogo gourmet con novas referencias procedentes de Yatecomeré, firma en cuxo accionariado participa desde hai dous anos. Esta incorporación reforza o seu posicionamento no segmento premium con produtos listos para cociñar que combinan calidade, tradición e innovación.
Entre as novas propostas destacan dúas variedades de croquetas: unha opción 100% vegana de berenxena e unha croqueta de bacallau, ambas pensadas para o canle HORECA (siglas de Hoteis, Restaurantes e Cafeterías).
Estes lanzamentos súmanse a unha gama consolidada que inclúe referencias clásicas como xamón ibérico, polo de curral ou boletus, xunto a propostas máis sofisticadas como carabineiro, gambón salvaxe ou centola.
Referencias para hostalería
Xunto a esta oferta gourmet, a empresa da Pobra do Caramiñal tamén presentará as últimas innovacións de Ibercook, a súa marca orientada a hostalería. Entre os novos desenvolvementos atópanse produtos como a pescada rebozada ao ovo corte J, a argola de potón empanada, o churro lazo especial para forno e airfryer, o lagostino crunchy e as patrullitas de pescada.
CONGALSA explica que “estas solucións están deseñadas para garantir uniformidade, rendemento e facilidade de preparación en cociña profesional, respondendo as esixencias de restaurantes, hoteis
e colectividades; e ademais complementan un catálogo xa consolidado que inclúe empanadillas, hamburguesa de abadexo ou rabas empanadas, entre outros”.
Os profesionais do sector poderán coñecer de primeira man estas novidades e outras referencias máis consolidadas en ambos os encontros. En concreto, en Seafood Expo Global Barcelona 2026, CONGALSA estará presente na caseta 5F501, onde presentará o seu catálogo e solucións a chefs, distribuidores e compradores.
Coa súa participación nestas citas, a compañía reforza a súa estratexia de crecemento na canle HORECA, apostando pola innovación, a sustentabilidade e o desenvolvemento de produtos de calidade que acheguen valor engadido, eficiencia e versatilidade aos profesionais da hostalería, en resposta á crecente demanda de solucións que combinen calidade gastronómica e practicidade. CONGALSA consolídase así como un socio estratéxico para o sector.
