A delegada da Xunta na Coruña, Belén do Campo, participou esta mañá no acto de corte de cinta da terceira etapa da volta ciclista O Gran Camiño, que uniu os concellos de Carballo e Padrón cun percorrido de 169 quilómetros e un desnivel acumulado de 2.470 metros.
Durante o acto, a representante autonómica destacou a relevancia desta proba deportiva, “xa plenamente consolidada no calendario ciclista”, subliñando que contribúe de maneira decisiva a situar Galicia “no mapa das grandes voltas ciclistas de España”.
Belén do Campo incidiu en que O Gran Camiño, creada no ano 2022, supuxo a recuperación do ciclismo profesional por etapas na comunidade, integrándose no circuíto UCI Europe Tour. Neste sentido, lembrou que a proba recolle o legado histórico da Volta a Galicia, disputada desde 1933 e pola que pasaron grandes figuras do ciclismo internacional.
Así mesmo, puxo en valor a rápida evolución da competición, que en apenas uns anos logrou atraer equipos e ciclistas de primeiro nivel mundial, consolidándose como unha das citas máis destacadas do calendario estatal.
En relación coa etapa Carballo–Padrón, a delegada salientou a súa esixencia deportiva e o seu simbolismo territorial, ao conectar enclaves de gran tradición ciclista e cultural, ademais de reforzar a proxección turística de Galicia a través dun evento que combina deporte, patrimonio e promoción do territorio.
“A celebración de probas como esta demostra a capacidade de Galicia para organizar eventos deportivos de alto nivel, xerando actividade económica e situando a Galicia como un destino de referencia tamén no ámbito deportivo”, concluíu.
