A Casa do Mar de Aguiño acolleu a presentación da novela curta “A Forcadiña”, da autora ribeirense Carmen González, nun acto cultural que reuniu a arredor de medio cento de asistentes.
A cita, organizada pola asociación Francisco Lorenzo Mariño, contou coa presenza de representantes da corporación municipal como a concelleira de Cultura, Ana Barreiro, a edil de Educación, Juana Brión, e o tenente de alcalde, Vicente Mariño, así como de Cruz Rivadulla. Tamén asistiron representantes do tecido social, entre eles JM Vilas, JA Santamaría e a presidenta da entidade organizadora, Elvira Pisos.
O acto estivo presidido polo vicepresidente da asociación, Unai González, quen introduciu a mesa e fixo unha presentación xeral da obra, ademais de avanzar as actividades previstas pola entidade para os meses de abril, maio e xuño.
A análise literaria correu a cargo de Xabier López Marqués, escritor, profesor e doutor en filoloxía hispánica, quen destacou a calidade da novela, subliñando a súa coidada construción narrativa, a profundidade dos personaxes e o uso da linguaxe. O relator amosouse sorprendido polo nivel da obra, asegurando que, malia tratarse dunha primeira novela, presenta unha madurez literaria notable.
Pola súa banda, Carmen González agradeceu o apoio da asociación organizadora e as palabras do crítico, lembrando o respaldo recibido desde as primeiras fases do proxecto. Durante a súa intervención, recitou un poema incluído na obra e destacou tamén o deseño da portada, realizado polo seu fillo Carlos, inspirado na Illa de Sagres.
“A Forcadiña” enmárcase no xénero policiaco e transcorre entre escenarios de Ribeira e Aguiño, combinando a actualidade cos anos 80. A obra aborda temáticas sociais como o maltrato, o feminismo ou a diversidade LGTBIQ+, ofrecendo unha narrativa áxil, emotiva e reflexiva.
O acto concluíu cunha sinatura de exemplares por parte da autora, nunha xornada que destacou pola boa acollida do público. Ademais, un 2% da recadación obtida coa venda do libro destinarase á asociación coruñesa de esclerose múltiple, engadindo así un compoñente solidario á iniciativa.
