A Xunta de Galicia vén de adxudicar por case 270.000 euros as obras de peche lateral da pista deportiva do instituto de Porto do Son, unha actuación que executará a empresa Construcciones Iglesias Mera nun prazo estimado de tres meses desde o inicio dos traballos.
O proxecto ten como finalidade reparar os danos causados polos temporais, que provocaron o derrubamento de muros, e mellorar a protección da instalación fronte ás inclemencias meteorolóxicas e ao acceso non autorizado.
Para iso, construirase un peche de 3,75 metros de altura con paneis prefabricados de formigón e unha parte superior con chapa ondulada microperforada de aluminio, que permitirá a ventilación e a entrada de luz natural, ao tempo que protexe das choivas laterais. Ademais, instalaranse novos sistemas de evacuación de augas pluviais e renovarase a cuberta dos vestiarios con panel sándwich.
Esta intervención forma parte das primeiras 16 actuacións previstas este ano pola Consellería de Educación, Ciencia, Universidades e Formación Profesional en centros educativos, cun investimento global superior aos 16 millóns de euros. No conxunto de 2026, a Xunta destinará 73,6 millóns de euros a infraestruturas educativas, un 4 % máis que no exercicio anterior.
No ámbito da comarca do Barbanza, o Goberno galego mobiliza máis de 8,5 millóns de euros ao abeiro do Plan de nova arquitectura pedagóxica. Entre as actuacións xa realizadas destacan o cambio de cuberta no instituto de Porto do Son e no CEIP Santa Irene, así como rehabilitacións integrais en centros como o IES da Pobra do Caramiñal, o IES Plurilingüe Fontexería de Muros, o CEIP Alfonso Daniel Rodríguez Castelao de Rianxo e o CEIP Plurilingüe de Frións, en Ribeira.
Ademais, atópase en fase de licitación a rehabilitación integral do CEIP Plurilingüe Praia Xardín, en Boiro, cun investimento previsto de 1,1 millóns de euros.
