Desde este venres a Universidade de Santiago de Compostela (USC) ten ao seu leme as mans dunha muller, a primeira que decide -xunto os seus compañeiros de reitorado- o presente e o futuro desta fundamental institución, que xurou o cargo nun acto no que estiveron asimesmo presentes os reitores das universidades irmáns de Vigo (UVigo) e A Coruña (UDC) e que presidiu o titular da Xunta de Galicia, Alfonso Rueda.
Coma principais obxectivos da nova responsable da USC figuran a construción dunha nova universidade “que avance e innove” e “afortalar” os campus de Compostela e Lugo. A ribeirense, porque “non pode existir excelencia académica sen unha atención axeitada ás condicións vitais e sociais” do estudantado.
Traballar desde a responsabilidade é o seu compromiso e que a USC sexa a institución pública galega “de máxima excelencia académica” un obxectivo a cumprir para a facer “máis feminista e inclusiva” mantendo firme o seu compromiso con Galicia, o país ao que “pertence e serve”. Salientou o feito de que por vez primeira unha muller chegara ao cargo reitora e reivindicou que tal conquista permita o afianzamento dunha universidade plenamente democrática: “viva, aberta”, con maior financiamento e aposta polo diálogo e a coordinación coas outras dúas universidades galegas.
Rosa María Crujeiras Casais naceu en Ribeira no ano 1978. É catedrática de Estatística e Investigación Operativa. Sucede no cargo a Antonio López Díaz. É a reitora número 173 da institución universitaria galega máis antiga: 531 anos. É o momento de derrubar os teitos de cristal. Para que isto sexa unha realidade tanxible non deben faltar financiamento, diálogo e coordinación coas outras dúas institucións universitarias galegas.
Afeita a ollar o mar cada día, que nunca falle, reitora, o leme do barco do coñecemento en Galicia.
