Os Premios Ramiro Carregal reivindican a investigación como clave no avance contra o cancro
O Hotel Monumento San Francisco de Santiago acolleu este xoves 30 de abril a gala de entrega dos Premios Internacionais de Investigación Oncolóxica Ramiro Carregal, que na súa décimo cuarta edición puxeron o foco na investigación como o principal camiño para mellorar o diagnóstico e tratamento do cancro.
O Hotel Monumento San Francisco de Santiago deu acubillo este xoves 30 de abril, a gala de entrega do XIV Premio Internacional de Investigación Oncolóxica Científica e Técnica Ramiro Carregal, dotado con 30.000 euros, ao doutor Emilio Alba Conejo e do VII Premio a Talentos Emerxentes á doutora Patricia Altea Manzano. Este galardón incrementou a súa contía nesta edición, polo que o proxecto da doutora Altea recibe 15.000 euros.
O acto estivo presidido polo xefe do Goberno galego, Alfonso Rueda, quen quixo acompañar, unha vez máis, o empresario e mecenas Ramiro Carregal, fundador da empresa FRINSA con sede en Ribeira, quen destacou o percorrido desta iniciativa. “Nestes case 15 anos quixemos recoñecer os máis destacados investigadores dunha enfermidade que segue provocando moita dor, pero que, cada vez, cúrase máis. E iso é grazas á ciencia, aos investigadores e médicos que traballan cada día para mellorar a sanidade e a saúde de todos”, sinalou.
O presidente executivo do xurado, o doutor Rafael López, agradeceu a Ramiro Carregal o seu compromiso con este premio Internacional e felicitou os galardoados por incorporarse a unha longa lista de médicos e investigadores que están a contribuír a cambiar radicalmente a abordaxe do cancro. O doutor López foi o encargado de ler o fallo do xurado que outorgou o VII Premio Talentos Emerxentes á doutora Patricia Altea, científica titular de Organismos Públicos de Investigación do Centro Andaluz de Bioloxía Molecular e Medicamento Rexenerativo (CABIMER), e o XIV Premio Internacional ao doutor Emilio Alba, catedrático de Oncoloxía da Universidade de Málaga, investigador principal do Grupo de Investigación Clínica e Translacional en Cancro de IBIMA e director científico da Fundación CITAC (Centro de Investigación e Terapias Avanzadas do Cancro).
Agradecemento de Emilio Alba
No seu discurso de agradecemento, o doutor Alba destacou a “impresionante” evolución da oncoloxía desde que iniciou a súa actividade nos anos 80, cando os pacientes eran diagnosticados con medios radiolóxicos que hoxe poderían resultar rudimentarios, as cirurxías eran moi agresivas, a radioterapia moi imprecisa “e só dispuñamos de algo máis dunha decena de fármacos con verdadeira actividade contra a enfermidade tumoral”.
Desde entón, sinalou, o coñecemento biolóxico sobre o cancro “medrou de forma exponencial” permitindo métodos de diagnóstico moi precisos e sensibles, cirurxías moi eficaces e pouco invasivas, novas técnicas de radioterapia con moita menos toxicidade e tratamentos como terapias antidiana (medicina de precisión) ou inmunoterapia.
“O resultado final”, dixo, “foi que a supervivencia do cancro practicamente dobrouse nas tres últimas décadas pasando do 30 ao 60%”, explicou o premiado, quen lembrou que o obxectivo marcado pola Comisión Europea é lograr unha supervivencia do 70% en 2030. “Obxectivo ambicioso pero que debemos tentar conseguir”, subliñou.
Intervención de Patricia Altea
A investigadora Patricia Altea quixo aproveitar a súa intervención para lanzar unha mensaxe ás novas xeracións: “Sei que este camiño pode parecer difícil, mesmo inalcanzábel ás veces. Pero tamén sei que, con motivación, esforzo e paixón, é posible percorrelo. Non só para alcanzar metas persoais ou recoñecementos como este, senón para formar parte de algo moito máis importante: contribuír a facer da nosa sociedade un mundo mellor”.
A premiada explicou que o seu camiño na investigación comezou “cunha pregunta moi sinxela: entender o cancro”. Co tempo, comprobou que non se trataba só de entender a enfermidade, “senón de contribuír, aínda que sexa un pouco, a cambiar a vida das persoas”. Un camiño que a levou por diferentes etapas, países e laboratorios, pero do que aínda queda moito por percorrer. Finalmente, agradeceu a Rafael López, pola súa implicación nestes premios e polo seu extraordinario labor no campo da oncoloxía. “É un referente para min e unha inspiración para moitos de nós”, sinalou.
O presidente da Xunta de Galicia, Alfonso Rueda, felicitou os premiados, así como a todas as persoas que contribúen ao avance da sociedade, especialmente ao empresario Ramiro Carregal polo seu exemplo de mecenado e implicación. Entre os asistentes estaban, ademais dos membros do Xurado, o conselleiro de Sanidade, Antonio Gómez Caamaño; a alcaldesa de Ribeira, María Sampedro, a alcaldesa de Santiago, Goretti Sanmartín; varios representantes das corporacións locais de Santiago e Ribeira entre eles o concelleiro, Vicente Mariño; a nova reitora da USC, a ribeirense Rosa Crujeiras; os membros do Xurado que outorga este premio, así como numerosas personalidades do ámbito académico, sanitario e institucional de Galicia.
