A Escola de Formación Náutico-Pesqueira de Ribeira reafírmase como un dos principais referentes na formación marítima en Galicia, cun total de 105 persoas matriculadas no presente curso académico.
Así o destacou a directora xeral de Desenvolvemento Pesqueiro, Ángeles V. Suárez, durante unha visita ao centro na que puxo en valor o papel clave da formación especializada para garantir a competitividade, a sustentabilidade e a remuda xeracional no sector marítimo-pesqueiro.
Durante o percorrido polas instalacións, a responsable autonómica coñeceu de primeira man os programas formativos e os recursos do centro, que conta desde hai semanas cun novo equipo directivo. A visita serviu tamén para intercambiar impresións sobre os retos e oportunidades dun sector estratéxico para Galicia.
No encontro, a Consellería do Mar reafirmou a súa aposta pola capacitación profesional en ámbitos como a navegación, a seguridade marítima, a acuicultura e a xestión sostible dos recursos mariños. Para este ano 2026, o departamento autonómico destina 12,4 millóns de euros á formación náutico-pesqueira.
No conxunto dos centros dependentes da Consellería impártense ciclos superiores como Pesca de Altura e Acuicultura, así como ciclos medios de Pesca de Litoral, Cultivos Acuícolas e Operacións Subacuáticas e Hiperbáricas. Actualmente, suman 474 persoas matriculadas, das que o 12,86 % son mulleres. Ao remate do curso, prevese a incorporación de 185 novos profesionais ao sector.
Desde 2008, a Escola Náutico-Pesqueira de Ribeira acumula 1.740 alumnos na formación regrada, consolidando o seu papel como motor de desenvolvemento económico e social tanto para a comarca do Barbanza como para o conxunto de Galicia.
