A Deputación da Coruña concedeu definitivamente o programa de subvencións DP0029/2026. Esta liña de axudas, impulsada polo Servizo de Promoción e Desenvolvemento Turístico, permitirá que un total de 54 concellos e agrupacións locais da provincia conten con financiamento para sufragar os gastos de persoal das súas oficinas de turismo durante o presente exercicio.
O investimento total mobilizado pola institución provincial ascende a 795 217,43 euros. Estas axudas están destinadas especificamente a municipios de menos de 50 000 habitantes, asegurando que as localidades con menores recursos poidan ofrecer un servizo de atención ao visitante de calidade e profesional.
O vicepresidente da Deputación, Xosé Regueira, destacou que este investimento “é clave para consolidar a provincia como un destino turístico sustentábel e ben xestionado”. Segundo Regueira, “o persoal técnico das oficinas é o primeiro contacto que o viaxeiro ten co noso territorio; o seu traballo é fundamental para poñer en valor o patrimonio, a gastronomía e a paisaxe dos nosos concellos”.
Engadiu que “o programa de subvencións responde a un compromiso coa equidade territorial, o que é especialmente importante nos concellos máis pequenos, que poderán manter equipos cualificados sen comprometer os seus orzamentos”.
As subvencións cobren desde a contratación directa de técnicos ata a externalización de servizos de información, garantindo que os puntos de atención —moitos deles situados en enclaves estratéxicos como o Camiño de Santiago, as Fragas do Eume ou a Costa da Morte— permanezan operativos e atendidos por profesionais.
No Barbanza e Sar
Concello da Pobra do Caramiñal
18 387,75 €
Concello de Boiro
19 195,72 €
Concello de Carnota
17 348,94 €
Concello de Muros
17 695,21 €
Concello de Noia
15 963,86 €
Concello de Outes
12 705,00 €
Concello de Padrón
18 089,50 €
Concello de Porto do Son
15 386,74 €
Concello de Rianxo
15 848,44 €
Concello de Ribeira
20 000,00 €
