A Área de Cultura da Deputación da Coruña conmemora o Día Internacional da Danza cun ciclo de actividades baixo o título “Facermos do corpo un poema”, que se desenvolverá entre o 27 e o 29 de abril en tres concellos da provincia: O Porto do Son, Sada e Arzúa.
A iniciativa combinará espectáculos de danza con unha charla coloquio a cargo da escritora María Lado, co obxectivo de achegar esta disciplina artística á cidadanía a través de propostas abertas ao público en espazos culturais municipais.
O ciclo dará comezo o luns 27 de abril, ás 12.00 horas, na Casa da Cultura do Porto do Son. Continuará o martes 28, ás 12.30 horas, na Casa da Cultura ‘Pintor Lloréns’ de Sada, e rematará o mércores 29, tamén ás 12.00 horas, na Casa da Cultura de Arzúa.
A proposta inclúe dous espectáculos de danza que se complementarán coa intervención final de María Lado, nun formato que busca fomentar o diálogo arredor do corpo como ferramenta de expresión artística.
O Día Internacional da Danza celébrase cada 29 de abril desde 1982, e esta programación enmárcase na aposta da Deputación por promover a cultura en todo o territorio, poñendo en valor a danza como linguaxe creativa e facilitando o acceso da cidadanía a este tipo de iniciativas.
