A directora xeral de Desenvolvemento Pesqueiro, Ángeles V. Suárez, visitou este venres 10 de abril a sede da Confraría de Lira (Carnota), onde avaliou o impacto das axudas para a modernización de equipamentos pesqueiros portuarios que, nos últimos seis anos, superaron os 900.000 euros para esta entidade. Suárez cualificou o dito impacto de “positivo”.
Suárez dixo que “o esforzo investidor da Consellería do Mar permitiulle ao pósito carnotán realizar importantes investimentos como a adquisición dunha unidade de xestión de pesada e etiquetado para facilitar o traballo diario de recollida de datos de polbo e outras especies; a mellora da eficiencia enerxética da lonxa, así como da calidade dos produtos desembarcados coa incorporación de contedores isotermos para o almacenamento; a compra doutros equipamentos ou a renovación das luminarias e das cámaras de conxelación, entre outras actuacións”.
No transcurso do encontro, tamén se puxo en valor que, para o bienio 2026-2027, a Xunta destinará na orde publicada en xaneiro máis de 10 millóns de euros: unha dotación económica que estará cofinanciada polo Fondo Europeo Marítimo, da Pesca e da Acuicultura (FEMPA), e que incorpora como novidade a posibilidade de solicitar anticipos ou pagos a conta dun xeito máis sinxelo, “o que permite unha execución máis áxil”, salientou Suárez.
A directora xeral puxo en valor estes apoios, “pois”, dixo, “amosan o compromiso do Goberno galego co sector pesqueiro artesanal, ao permitir a modernización das infraestruturas e mellorar as condicións de traballo dos profesionais do mar”. Por tanto, son investimentos, engadiu, “que contribúen a incrementar a competitividade da frota, a garantir a sustentabilidade da actividade e a reforzar a seguridade nas tarefas diarias”.
