A Asociación Rianxeira de Empresarios (ARE) pon en marcha a campaña PremiARE, unha nova acción de dinamización comercial que en palabras da entidade empresarial “combina consumo no comercio local cunha proposta lúdica e participativa dirixida á cidadanía”. A campaña levarase a cabo entre o 13 e o 22 de abril, período durante o cal as persoas que realicen compras nos establecementos asociados poderán gardar os seus tíckets, necesarios para participar na actividade principal.
O 22 de abril, a praza do Concello acollerá un xogo presencial aberto ao público, baseado nun panel temático de primavera decorado con flores. Cada participante poderá escoller flores de forma progresiva, que agochan preguntas relacionadas con Rianxo e o seu tecido comercial.
A ARE sinalal que a dinámica estrutúrase por niveis: por cada resposta correcta, a persoa participante avanza e obtén premios, podendo decidir en determinados momentos se continuar ou retirarse cos agasallos acumulados. A partir dun determinado nivel, o xogo incorpora tamén un compoñente de risco, xa que un erro pode implicar a perda dos premios.
Entre os agasallos inclúense produtos promocionais como bolsas reutilizábeis, botellas, cuncas ou mochilas, así como vales de compra para gastar nos establecementos locais, reforzando así o impacto da campaña no comercio de proximidade.
Como complemento á actividade presencial, a campaña contará tamén cunha dinámica participativa nas redes sociais da ARE, na que se lanzarán preguntas relacionadas co comercio e coa realidade local. As persoas participantes poderán responder a través da páxina web da patronal rianxeira e optar a pequenos premios.
Como dixemos, esta iniciativa ten como obxectivo “incentivar o consumo no comercio local, dinamizar o espazo público e reforzar o vínculo entre a veciñanza e os negocios da vila, poñendo en valor o papel do comercio de proximidade na economía e na vida social de Rianxo”.
