O Centro Social de Abanqueiro (Boiro) vai acoller este venres 6 de marzo un novo espectáculo de primeira liña: Territorio Regueifa, unha actuación teatral dirixida por José L. Prieto e que contará coa presenza dos reguefeiros Lupe Blanco, Josinho da Teixeira e Manolo Maseda para público adulto. A cita será ás 21.00 horas e a venta de entradas estará dispoñíbel dende unha hora antes do inicio da función (3,5 euros).
Territorio Regueifa é un espectáculo de teatro, humor, música e improvisación, no que dous regueifeiros e unha regueifeira introdúcennos na arte da regueifa, as súas orixes , a súa evolución, e a súa vixencia na actualidade.
O espectáculo combina a parte didáctica coa recreación de distintas escenas teatrais, como a primeira regueifa da historia, a incorporación da muller no mundo da improvisación rimada, ou como sería un telexornal da galega feito en verso, e tamén o público participará de forma activa recibindo unha clase de iniciación á improvisación oral cantada, que rematará cunha gran festa musical final.
