O Concello de Padrón deu a coñecer dous dos principais atractivos das Festas da Pascua 2026: o nome do pregoeiro e os detalles da tradicional Feira Cabalar, unha das citas máis emblemáticas do calendario festivo galego.
O xornalista deportivo Terio Carrera será o encargado de pronunciar o pregón oficial, que terá lugar o vindeiro 4 de abril ás 21.00 horas na Praza de Macías. A súa elección enmárcase nun ano de especial relevancia deportiva para o municipio, que acollerá catro eventos ciclistas de primeiro nivel, consolidándose como referente galego neste ámbito.
Con máis de catro décadas de traxectoria, Carrera desenvolveu a súa carreira fundamentalmente na Radio Galega e na Televisión de Galicia, participando na cobertura de probas internacionais como o Giro de Italia, o Tour de Francia ou La Vuelta a España. Nos últimos anos mantivo unha estreita vinculación co ciclismo e coa vila, colaborando como speaker en eventos promovidos polo exciclista Ezequiel Mosquera e en probas como a Clásica de Pascua, as Rutas Xacobeas ou a etapa de La Vuelta celebrada en 2024 en Padrón.
Feira Cabalar o 5 de abril
No marco da programación festiva, o domingo 5 de abril celebrarase no Campo da Barca unha nova edición da Feira Cabalar da Pascua a partir das 10.00 horas, reunindo criadores, gandeiros e afeccionados ao mundo ecuestre.
O evento incluirá diversos concursos morfolóxicos, entre eles o oficial da XXV Copa Galicia de Cabalos e Eguas de Pura Raza Galega, así como probas para exemplares cruzados, razas pesadas —como percheróns, bretóns e hispano-bretóns— e cabalos de Pura Raza Árabe. Tamén haberá un concurso infantil de ponis para fomentar a participación da rapazada.
Como un dos pratos fortes da xornada, ás 13.00 horas terá lugar o Gran espectáculo de doma Pascua 2026, protagonizado por El hechizo de la Rosa, galardoado cunha medalla de prata no Salón Internacional do Cabalo (SICAB 2025), a cargo da compañía ecuestre La Magia del Caballo de León. O espectáculo contará tamén coa participación da sección de doma de Alta Escola de Galicia Dragóns de Santiago, pertencente á Asociación Pura Raza Cabalo Galego.
Desde o Concello anímase á veciñanza e ás persoas visitantes de toda Galicia a achegarse á vila para gozar dunha das celebracións máis destacadas da primavera galega.
