A cidade de Santiago de Compostela acolleu o acto simbólico de lembranza ao escritor Ramón María del Valle-Inclán coa colocación dunha bufanda na súa estatua situada no Paseo dos Leóns da Alameda de Santiago de Compostela.
A iniciativa, organizada pola Fundación Granell coa colaboración do Museo Valle-Inclán da Pobra do Caramiñal, busca reforzar o vínculo entre o escritor e a cidade, asumida como un dos escenarios centrais do seu imaxinario literario.
Esta iniciativa, que se repite anualmente, pretende render homenaxe á figura e ao legado literario do autor galego, estreitamente vinculado á cultura e á historia de Galicia. A colocación da bufanda na estatua constitúe un xesto simbólico que busca manter viva a memoria dun dos escritores máis destacados da literatura española.
Durante o acto realizouse a lectura de fragmentos da súa obra, nun espazo tan emblemático da cidade como é a Alameda compostelá.
Os organizadores destacan que Santiago de Compostela, coa súa riqueza histórica e cultural, foi descrita polo propio autor como a “Rosa Mística de Pedra”, unha imaxe que reflicte a singularidade da cidade e o seu profundo valor simbólico dentro da cultura galega. A homenaxe busca así lembrar non só ao escritor, senón tamén a súa relación coa capital galega e coa tradición literaria do país.
Esta cita, que se mantén ininterrompidamente desde hai 19 anos, fortalece os lazos entre as entidades museísticas de Santiago e A Pobra do Caramiñal, lugares con gran significación biográfica e creativa para Valle-Inclán. Alfonso Daniel R. Castelao xa cualificaba a este escritor como o mellor artista de Galicia.
A data do acto non é casual, pois marca a efeméride da última visita de Valle-Inclán a Galicia. O 7 de marzo de 1935 chegaba en ferrocarril á estación de Cornes, onde foi recibido por un grupo de xoves simpatizantes e vellas amizades. Alí comezou a súa derradeira estadía en Santiago, instalándose no Hotel Compostela antes de ser ingresado no sanatorio do doutor Villar Iglesias, onde o agravamento da súa doenza levaría ao seu falecemento o 5 de xaneiro de 1936. Foi soterrado no cemiterio de Boisaca baixo unha lousa rústica traídade dende O Barbanza. (Luís Pérez Crujeiras)
