O presidente da Xunta de Galicia, Alfonso Rueda, salientou o compromiso do Goberno autonómico coa mellora do saneamento en Vilagarcía de Arousa a través dun conxunto de actuacións que suman un investimento global de 43,2 millóns de euros.
Durante unha visita aos traballos en execución, o titular do Executivo galego destacou a necesidade de contar cun sistema de depuración “á altura desta cidade” que permita preservar o medio ambiente, a ría de Arousa e os ríos da contorna.
Rueda percorreu as obras do tanque de tormentas na contorna da rúa Valle-Inclán, actualmente en execución, así como o situado xunto a Fexdega, xa rematado. Segundo explicou, os traballos para optimizar a rede municipal avanzan a bo ritmo e atópanse xa executados ao 80%, cun investimento de 11,8 millóns de euros. A previsión é que estean finalizados este verán.
Estas actuacións inclúen tamén a instalación de novos colectores e impulsións, co obxectivo de minimizar os alivios ao río do Con e mellorar a protección ambiental da ría.
Ampliación da depuradora
O presidente galego puxo en valor a futura ampliación da estación depuradora de augas residuais (EDAR) do municipio, unha infraestrutura clave que contará cun investimento de 31,4 millóns de euros. O 80% do financiamento correrá a cargo da Xunta, con apoio de fondos europeos, mentres que o 20% restante será asumido polo concello.
Esta actuación permitirá duplicar a capacidade da depuradora, que pasará de dar servizo a 46.000 habitantes equivalentes a preto de 100.000, atendendo tanto á poboación residente como á actividade industrial e ao incremento estacional de visitantes.
O contrato atópase actualmente en fase de licitación e está previsto que as obras poidan comezar en 2027.
Actuacións na ría de Arousa
Rueda explicou que estas intervencións forman parte dunha estratexia máis ampla para mellorar a calidade das augas da ría de Arousa. Neste sentido, citou actuacións previstas no saneamento da Illa de Arousa e no sistema Vilanova de Arousa-Cambados, así como proxectos de abastecemento como a ampliación da estación de tratamento de auga potable (ETAP) de Padrón e do Salnés.
Segundo indicou, Augas de Galicia destinará este ano 25,4 millóns de euros a actuacións nesta ría, o que supón un de cada seis euros do seu orzamento.
Chamamento á colaboración institucional
Durante a súa intervención, Alfonso Rueda destacou tamén a importancia da colaboración entre administracións para acometer este tipo de proxectos. Subliñou que moitos concellos non teñen capacidade para asumir obras desta envergadura, polo que a implicación da Xunta resulta “imprescindible”.
Neste sentido, avogou por superar diferenzas institucionais e traballar de forma conxunta para mellorar infraestruturas e servizos en beneficio da cidadanía.
