A Concellería de Xuventude do Concello de Ribeira vén de poñer en marcha o proxecto Por fin é finde, unha nova iniciativa destinada á mocidade do municipio a partir dos 12 anos que transforma a Casa da Xuventude nun espazo dinámico de encontro, formación e lecer saudable durante as fins de semana. O centro abrirá todos os sábados en horario de 17:00 a 20:00 horas, ofrecendo unha programación variada que combina actividades formativas, propostas creativas e espazos de esparexemento libre, sempre baixo a supervisión de profesionais.
Entre as actividades previstas inclúense obradoiros creativos como repostaría e customización, torneos de eSports e videoconsolas, concertos en directo, karaoke ou festas temáticas, así como propostas de formación vinculadas ao monitorado de ocio e tempo libre, organización de viaxes e roteiros.
O proxecto baséase nunha metodoloxía de participación activa, onde a mocidade non só participa senón que tamén propón contidos, fomentando a autoxestión e a aprendizaxe experiencial. Ademais, ao tratarse dun servizo gratuíto e sen inscrición obrigatoria para o uso do espazo, elimínanse barreiras de acceso e favorécese a integración de mozas e mozos de diferentes contornas.
A iniciativa comezou o pasado 28 de febreiro co Curso Oficial de Monitorado de Tempo Libre e, a partir do primeiro sábado de marzo, abrirase plenamente a toda a mocidade de Ribeira.Dende o Concello destacan que Por fin é finde supón un paso máis na consolidación da Casa da Xuventude como referente de participación e dinamización xuvenil no municipio, ofrecendo alternativas de lecer saudábel que contribúan á prevención de condutas de risco e ao fortalecemento da vida xuvenil.
